Әйбәт шагыйрьләр бик күп. Ә менә шигырь язучы апалар бармак белән генә санарлык. Шундыйларның берсе – Саҗидә апа Сөләйманова. Саҗидә Сөләйманова 1926 елның 3 октябрендә Башкортстанның Яңавыл авылында дөньяга килә. 1944 елда Саҗидә Тәтешле урта мәктәбен тәмамлый һәм ике ел авылда укытучы булып эшли. 1946 елда Уфадагы Башкорт педагогия институтының тарих факультетына укырга керә. Аны уңышлы тәмамлап, Башкортстанның Әбҗәлил районында бер ел балалар укыта. Аннары кияүгә чыгып Минзәләгә күчеп килә. Биредә – урта мәктәптә, 1955 елда Әлмәт нефть техникумында тарих укытучысы, шәһәр комитетында лектор, җирле радиода редактор булып эшли. Саҗидә апа Сөләйманованың беренче шигырь китабы 1963 елда басыла. «Кем уяткан Ләйләне?», «Җиденче көз» кебек җыентыкларына Саҗидә апаның балалар өчен атап язылган шигырьләре тупланган.Кызганыч, шагыйрь апа озак яши алмый. 1980 елның 10 маенда 54 яшен дә тутыра алмыйча, вафат була.

   Шигырь яшәгәндә, Сезнең исем дә онытылмас, Саҗидә апа!