Алдавыч әкиятләр
- Әүвәл заманда булган бик зур бер тау,
Шул тау башында бер төлке.
Бу әкиятне сөйләр идем,
Тик сөйләве бик көлке.
- Борын заманда булган, ди, бер патша,
Ул ясаттырган, ди, бик матур бер бакча.
Бакчаның коймасы булган, ди, таштан.
Сөйлимме хикәяне баштан?
- Элекке заманда
Безнең авылда булган бер бай.
Аның булган ике өе,
Берсе — агачтан, берсе — таштан.
Сөйлимме баштан?
— Сөйлә баштан.
— Сөйлим баштан.
Шуннан бу байның булган бер кәҗәсе.
Бай аны саткан.
Юк, алай түгел, сөйлимме баштан?
— Сөйлә баштан.
— Кәҗә йөри таштан.
Алдавыч әкият
- Борын-борын заманда булган, ди, бер бай.
Исеме – Акбулат.
Салдырган, ди бу Акбулат бик зур бер таш пулат.
Ишегенә салган, ди, бик зур йозак.
Сөйләр идем ул йозакны, сөйләве бик озак.
- Борын-борын заманда торганнар, ди,
Агай-энеле ике туган.
Берсенең исеме Сөйлә булган, ди,
Икенчесе — Сөйләмә булган.
Беркөнне Сөйлә базарга киткән .
Киткән бу, киткән.. . тукта, кайсысы өйдә калган?
— Сөйләмә.
— Алай булгач, сөйләмим.
- Борын заманда булган бер өстәл,
Ярый инде,
Калганын син сөйлә өстәп.
- Бар иде, ди, юк иде, ди,
Ач иде, ди, тук иде;
Бер тавыгы бар иде, ди,
Аны да булса карчыга алып китте, ди.
— Йә?
— Шул. Шуның белән бетте.
Әйтәм ич, карчыга алып китте.
- Бар иде, ди, бер мичкә,
Бу әкиятне сөйләрмен иртәгә кичкә .
- Бер әби белән бабай яшәгәннәр, ди.
Аларның булган, ди, әтәчләре.
Ул әтәч көн саен менгән, ди, киртәгә.
Калганын сөйләрмен иртәгә.
- Борын-борын заманда
Булган, ди, бер малай.
Сөйләп тә тормам әле,
Тавышлансагыз алай.
- Борын-борын заманда булган, ди, бер бай. Аның булган, ди, бер көтү сарыгы. Көтү кайтка н саен саный икән , ди, ул сарыкларын. Саный ди, саный ди, саный ди... Ярар, саный торсын, санап бетергәч, дәвам итәрмен...
|